Qərarın səbəbi məlumatların məxfiliyi ilə bağlı narahatlıqlardır.

Facemark.az xarici mənbəyə istinadən xəbər verir ki, İtaliyanın milli məlumatların mühafizəsi agentliyi məlumatların pozulması və chatbotun öyrədilməsi üçün şəxsi məlumatların istifadəsi üçün heç bir hüquqi əsas olmadığı səbəbilə ChatGPT-ni qadağan edəcəyini açıqlayıb.

Bu gün edilən açıqlamada, qərarın məxfiliklə bağlı narahatlıqlar səbəbiylə alındığı, ChatGPT-yə girişin dərhal kəsiləcəyi və ChatGPT-nin inkişaf etdiricisi OpenAI-a qarşı araşdırma aparılacağı bildirilib. Giriş qadağası şirkət Avropa Birliyinin Ümumi Məlumatların Qorunması Qaydasına (GDPR) əməl edənə qədər qüvvədə qalacaq.

ChatGPT alqoritmlərini öyrətmək üçün istifadə edilən fərdi məlumatların toplanması və saxlanmasına haqq qazandırmaq üçün heç bir hüquqi əsasın olmadığını bildirən qurumun iddiasına görə, sözügedən məlumatlar da düzgün işlənmir.

Agentlik həmçinin bəzi ChatGPT istifadəçilərinin digər istifadəçilərin söhbət mövzularını görməsinə səbəb olan bir səhv nəticəsində yaranan məlumat pozuntusunu qeyd etdi. OpenAI CEO-su Sam Altman bu səhvi ciddi bir problem hesab etdi və iki gün sonra paylaşdığı tvitində özlərini çox pis hiss etdiklərini ifadə etdi.

Qurumun diqqət çəkdiyi digər məqam isə yaş məhdudiyyətidir. ChatGPT-nin xidmət şərtlərində bunun 13 yaşdan yuxarı olanlar üçün olduğu bildirilsə də, qurumdan verilən məlumata görə, bunu təmin etmək üçün heç bir nəzarət yoxdur.

OpenAI-nin təşkilatın narahatlıqlarını həll etmək üçün hansı tədbirlərin görüldüyünü göstərmək üçün 20 günü var. Əks halda şirkət 20 milyon avro cərimə ödəməli ola bilər.