Facemark.az xarici mənbəyə istinadən "Dünyanın ən güclü və ən zəif pasportları" mövzusunda araşdırma yazını təqdim edir!
18 ildir Pasport İndeksini tərtib edən Henley & Partners builki nəticələri Dünya Bankının təqdim etdiyi məlumatlarla müqayisə edib. Yəni nəticələr dünyanın ən güclü və ən zəif pasportlarını üzə çıxarmaqla yanaşı, həm də pasportun qlobal iqtisadiyyata nə qədər çata biləcəyini göstərir. Nəticələrə görə, Yaponiya pasportu birinci, Əfqanıstan pasportu isə sonuncu yerdədir. Tədqiqatın nəticələri dünya miqyasında iqtisadi uçurumun dərinliyini də ortaya qoyur.
Pasportların möhkəmliyindəki fərq dünya miqyasında iqtisadi bölünmənin göstəricisidir.
2014-cü ilin ən güclü pasportu olan ABŞ pasportunun son 9 ildə gücünü itirdiyi görünür. ABŞ pasportu bu il 186 vizasız istiqamətə giriş imkanı ilə 7-ci yerdə qərarlaşıb.
BƏƏ isə artan populyarlığının və iqtisadi uğurunun göstəricisi olaraq cəmi 10 il ərzində 64-cü yerdən 15-ci yerə yüksəldi.
Henley & Partners Pasport İndeksini tərtib etməklə yanaşı, məlumatları Dünya Bankının təqdim etdiyi məlumatlarla da müqayisə edib. Bu əlavə araşdırma pasport gücü ilə iqtisadi güc arasındakı əlaqəni də ortaya qoyur. Məlumatlara görə, pasportların yalnız 6 faizi dünya iqtisadiyyatının 70 faizindən çoxuna çıxış imkanına malikdir.
Məsələn, Yaponiya pasportunun vizasız daxil ola biləcəyi 193 istiqamət qlobal iqtisadiyyatın 98 faizini təşkil edir. Bunun əksinə olaraq, siyahının sonunda olan Əfqanıstan pasportu qlobal ÜDM-in 1 faizindən də azına çata bilər. Beləliklə, nəticələr dünya miqyasında iqtisadi bölünməyə işarə edir.
Ən güclü pasportlar
- Yaponiya - 193 istiqamət
- Sinqapur və Cənubi Koreya – 192 istiqamət
- Almaniya və İspaniya - 190 istiqamət
- Finlandiya, İtaliya, Lüksemburq – 189 istiqamət
- Avstriya, Danimarka, Hollandiya, İsveç – 188 istiqamət
- Fransa, İrlandiya, Portuqaliya, Böyük Britaniya – 187 istiqamət
- Belçika, Çexiya, Yeni Zelandiya, Norveç, İsveçrə, ABŞ – 186 istiqamət
- Avstraliya, Kanada, Yunanıstan, Malta – 185 istiqamət
- Macarıstan, Polşa – 184 istiqamət
- Litva, Slovakiya – 183 istiqamət
Ən zəif pasportlar
- Sudan, Şri Lanka, Livan, Konqo - 42 istiqamət
- Liviya, Kosovo, Banqladeş – 41 istiqamət
- Şimali Koreya - 40 istiqamət
- Nepal, Fələstin - 38 istiqamət
- Somali - 35 istiqamət
- Yəmən - 34 istiqamət
- Pakistan - 32 istiqamət
- Suriya - 30 istiqamət
- İraq - 29 istiqamət
- Əfqanıstan – 27 istiqamət
